“شبكة” تونس ماهيش استثناء.. هذا هو المودال الاقتصادي لسرقة الدول والفنانين!

برشا عباد كي يقراو التحقيقات متاعنا على “شبكة” (Chabaka DMCC) وبلطي وحامد بوقشة، يمشيو في بالهم الي هذي مجرد “تخلويضة” تونسية ولا بيزنس مسخ في الكواليس متاعنا.

فيقو يا جماعة! الي صاير في تونس وشمال إفريقيا هو مجرد تطبيق حرفي لـ “كتيب التعليمات” (Manuel opératoire) متاع الشركة الأم: Universal Music Group. يونيفرسال ماهيش شركة فن تكتشف في المواهب.. يونيفرسال هي “ماكينة مالية” تخدم بـ Business model واحد: غرّق الفنان في الكريدي، واسرق فلوس الدولة.

باش تفهمو الي نحكيو فيه، لازم تتفرجو في هالفيديو الاستقصائي الي فضح السيستيم في فرنسا:

وهاو باش نلخصولكم كيفاش تخدم هالمافيا المقننة بالأرقام، باش تفهمو الي قاعد يصير لولادنا في تونس.

1. كذبة الـ “Avance”.. الفنان يخلص من لحمو

تمشي في بالكم كي رابور يصحح مع يونيفرسال بـ 100 مليون، معناها خذاهم في جيبو وتفرهد؟ مستحيل. كيما يوضح التحقيق، الـ Avance (التسبقة) ماهيش شهرية، هي في الحقيقة “قرض ربوي” [02:22].

الفنان ما يصور حتى مليم (Zéro Royalty) لين يرجع مصاريف الستوديو، الكليبات، والتسويق الكل. الشركة تسلفك فلوسها باش تخدم باهم، وتقيدهم دين على ظهرك. الفنان يولي مجرد خدام يخلص في الكريدي متاعو، بينما الشركة تملك الموسيقى وتتحكم في رقبتو.

2. سرقة المال العام (براكاج بالضخامة)

التحيل الكبير وين؟ في استغلال الدعم متاع الدولة. في فرنسا، الدولة تعطي منح للإنتاج الموسيقي (عبر SCPP) وتخفيضات ضريبية (Crédit d’impôt). هاو الحسبة الشيطانية متاع يونيفرسال بالأرقام:

• الشركة تصرف 100 ألف يورو باش تطلّع رابور جديد [12:00].
• تمشي للدولة، تاخو 30 ألف يورو (منح SCPP) وتزيد تاخو 21 ألف يورو (تخفيض ضريبي).
• يعني الشركة، فعلياً، صرفت من جيبها كان 49 ألف يورو.
• أما الصدمة وين؟ في الكونطرا متاع الفنان، الدين يقعد مقيد بـ 100 ألف يورو كاملين! [12:08].

النتيجة؟ كان الألبوم ينجح ويدخّل 80 ألف يورو، الشركة تهزهم الكل وتولي رابحة (80 ألف + 50 ألف دعم = 130 ألف، تنحي منهم 100 ألف مصاريف.. تطلع رابحة 30 ألف يورو). أما الفنان؟ يقعد مسال في 20 ألف يورو وميصورش حتى فرنك [12:28]. يونيفرسال ديما رابحة من ظهر الضرائب، والفنان يعوم في الشايح.

3. شركات “Indé” وهمية.. للتحايل على القانون

باش الدولة ما تفلسش، القانون الفرنسي حط سقف (Plafond): كل شركة عندها الحق في 1.5 مليون يورو دعم من الدولة في العام. شنوة عملت يونيفرسال باش تتحايل على القانون؟ خلقت عشرات الـ Labels الصغار الي يبانو “مستقلين” ومتاع ولاد حوم (كيما Affranchi Music متاع Fianso، ولا Millenium) [08:46].

في الحقيقة، هما مجرد “Coquilles vides” (شركات واجهة) تابعين ليونيفرسال. يفرتكو الشركات باش كل وحدة تاخو الـ 1.5 مليون يورو متاعها. هذا يتسمى “تحيل ضريبي صناعي” (Optimisation fiscale industrielle)، وهياكل كيما SCPP الي توزع في الفلوس، شكون يحكم فيها؟ رؤساء يونيفرسال والشركات الكبرى بيدهم! قاضي وخصم في نفس الوقت [11:32].

4. كذبة “Planète Rap”.. الفنان يخلص باش يخدم

حتى الراديوات داخلة في اللعبة. تمشي في بالكم التعدية في حصة كيما Skyrock بلاش خاطر الفنان طيارة؟ الـ Label يشري “Pack promo” يتكلف بين 20 ألف و 50 ألف يورو [05:35]. وشكون يخلصهم في اللخر؟ الشركة تقيدهم على ظهر الفنان! الرابور يمشي يعرق ويغني ويطلّع في نسبة المشاهدة متاع الراديو، وفي اللخر هو الي يخلص حق الترويج متاعو من دينو للشركة.

الخلاصة: الربط مع تونس (Chabaka MENA)

توة اربطو بسهم، وحلو عينيكم.

الي تعمل فيه يونيفرسال في فرنسا بفلوس الضرائب، هو بيدو الي قاعدة تعمل فيه فرعها “Chabaka” في تونس والـ MENA. يجيبو فنانين كيما بلطي ولا نوردو، يعطيوهم تسبقة (Avances) ملغمة، يفكولهم الـ Masters (حقوق الملكية)، ويهربو المداخيل بالعملة الصعبة لشركات أوفشور في دبي (Universal Music MENA).

الفنان التونسي يولي ماكينة تخدم باش تصب الديفيز البرة، والدولة التونسية (البنك المركزي) تخسر المليارات من الاحتياطي متاعها.

دوسي “شبكة” ماهوش حالة معزولة، هو “فرع محلي” لمافيا عالمية تطبق في نفس المودال الاقتصادي الهدام في العالم الكل. والي ما فهمش اللعبة، يقرى الدوسيات. الماكينة هذي باش نطيحوها، بالوثيقة والقانون.